Lu venniri matinu agghiorna chiaru
la bedda matri si misi ‘ncamminu
‘ncuntrau a San Giuvanni pi la via
ci rissi unni stati ‘ennu oh matri mia
vaju circannu lu me caru figghiu
lu persi e unni lu pozzu chjiù a sciari
iti ‘nta la casuzza di Pilatu
lu iti a sciari ‘nchiusu e ‘ncatinatu
tuppi tuppi cu è docu darreri
sugnu la tò matruzza addulurata.
Oh cara matri mia un ti pozzu apriri
ca li giurei mi stannu ‘ncatinannu,
iti docu darreri c‘è l‘arginteri
facitici l‘aneddu a lu Signuri
l‘aneddu pi lu Signuri nun ci stavi
ci stannu tri chiuviddi e peri a cruci.
Oh caru mastru chi faciti a st‘ura
fazzu tri chiova apposta pi lu Signuri.
L‘aneddu pi lu Signuri nun ci stavi
ci stannu tri chiuviddi e peri a cruci.
Oh caru mastru chi faciti a st‘ura
ti pagu la nuttata e la mastrìa.
Oh cara matri mia un lu pozzu fari
unni c‘è Gesi ci mettinu a mia.
La bedda matri  ‘ntisi stu parrari
fici vutari munnu terra e mari
la bedda matri ‘ntisi stu parrari
fici vutari munnu terra e mari.