Palermo Turismo - Cultura e tradizioni
Canti e cunti
Canti della tradizione popolare


 
 
TI DUMANNAMU GRAZIA
(San Mauro Castelverde)
 
Era u sabatu prima d‘a fera.
U suli era assai cauru e ‘nta l‘aria c‘eranu chiossai di quaranta regni di frummjentu pisatu. Vientu nun nni sciusciava di tri jorna.
"Santu Maruzzu, si nni fai spagliari entru stasira - diss‘a Peppi c‘a trarenta ‘e manu - ti prumittimu chi jo ti puertu ‘ncuetru ppi tutti i quattru jorna e chi mme muglieri ti fa quattru viaggi scauzi". Prima di scurari. Peppi spagljau e raccuglìu chiossai di vinti tummina di frummjentu.
Peppi ppi tutti i quattru jorna purtau ccu firi Santu Maruzzu e, a mugljeri, scauza ccu na torcia, si misa appriessu ‘o Santu ppi ringraziallu pp‘a grazia ricivuta.
 
 
 
 MARIA DI GESU‘
 
Di Trapani passau Maria di Gesù
‘ncoddu li marinari la purtaru.
 
Li munaceddi subbitu scinneru
ed a Maria lu velu arrialaru,
 
Maria ci arrispunniu sutta lu velu
figghi vi binidicu e mi nni vaiu.
 
Tinchi tinchi la campanedda
vannu annannu li virgineddi
vannu annannu cu Maria
vannu dicennu la litania.
 
TUTTI  L‘ANCILI BIATI
 
Tutti l‘ancili biati,
chi pi‘ via l‘accumpagnaru
C u splinnuri inusitati,
chidda grutta circundaru.
 
San Giuseppi li vidia
e vidennuli gudia
oh pinsati c‘alligrizza
di li santi e amati spusi..
 
Chi gudennu sta biddizza, sunnu allegri e gluriusi.
Doppu aviri tanti stenti, a sta vista su cuntenti.
 
Binchì l‘ancili assistianu,
rispittusi li guardavanu,
Li timpesti chi facianu,
troppu assai li turmintavanu.
 
Decimila serafini,
onuraru l‘equipaggiu.
A sti‘ santi pilligrini
‘nta stu poviru viaggiu.
 
(Ralligrannu pi la via a Giuseppi e a Maria).
 
 
NNI LA NOTTI TRIUNFANTI
 
Ni la notti triunfanti, ca nasciu l‘Onniputenti
Si parteru supra i cammelli.
 
Li tri re di l‘orienti.
Li tri re di l‘orienti.
 
Li tri stiddi putenti di lu celu calaru
s‘accurdaru li strumenti.
 
E cu lu cori hannu cantatu
e cu lu cori hannu cantatu.
 
E Maria ha dittu ognunu,
vi ringraziu di l‘affettu.
Ca purtastivu cu rispettu.
 
(A me Figghiu u‘ bambineddu
A me figghiu u‘ bambineddu).


 
 

Ultimo aggiornamento di questa pagina: 03-DIC-18
 

Provincia Regionale di Palermo - Copyright @2005 - Strumenti Software a cura di Seed